L. M.C. ezali na posa na yo, ozala na Congo to mosika, yaka kosangana na biso elongo na mabondeli.
L.M.C. ezali lingomba ya mayangani te, yango ezali kosangisa bandimi nioso oyo balingi kopesa tango na bango mpo na kobundela mboka congo na mabondeli. Tokotelema ngwi mikolo nioso, butu mpe moyi mpo ete Nzambe atelemisa mboka congo,mpe alongola yango na pasi mpe bosoto. Etumba ya Bakrito ezali ya minduki te. Masasi na biso yango ezali se losambo. Elonga na biso ezali na maboko ya Nzambe .
Mapamboli.com ezali na posa na yo, ozala na Congo to mosika, tolingi kosangana elongo na mabondeli.
Mapamboli.com ezali kosangisa bana mpe mikolo, basi mpe mibali, bato banso oyo balingi kopesa tango na bango mpo na mabondeli. Tokobondela mpo na bandeko oyo bazali na pasi, bamboka oyo ezali na mitungisi, bandimi oyo bazali koniokama mpo na kondima na bango. Tokokota makambo ya politiki te. Tokolakisa moto mosapi te. Likambo yango nini ekokwela biso oyo Nzambe ayebi te, Eloko nini akoki kosala te mpo na biso, to mpo na mboka Congo ?
BANZEMBO 5
1 Yawe, yoka maloba na ngai; mpe tala kolela na ngai! 2 Mokonzi na ngai mpe Nzambe na ngai, yoka koganga oyo nazali koganga mpo na kosenga lisalisi, pamba te epai na yo nazali kobondela. 3 Yawe, na tongo oyokaka mongongo na ngai; na tongo natiaka makambo oyo nasengaka liboso na yo; mpe nazelaka eyano na yo. 4 Pamba te ozali Nzambe oyo osepelaka na makambo ya mabe te; mpe moto ya mabe akoki kofanda elongo na yo te. 5 Bato ya lolendo bakoki kotelema na miso na yo te; mpe oyinaka baoyo nyonso basalaka mabe. 6 Obebisaka bato oyo balobaka lokuta; Yawe ayokaka somo mpo na bato oyo basopaka makila ya bato mpe baoyo bakosaka. 7 Kasi ngai nakokota na ndako na yo, mpo na boboto na yo oyo eleki monene; mpe nakokumbama na kati ya ndako na yo ya bosantu, na botosi nyonso oyo nazali na yango epai na yo. 8 Yawe, kamba ngai kati na bosembo na yo; mpo na banguna na ngai; bongisa nzela na yo liboso na ngai. 9 Pamba te, makambo oyo bakoki kotiela elikya ezali na minoko na bango te; mitema na bango etondi na makambo oyo ebebisaka; bakingo na bango ezali lokola malita oyo efungwama, mpe lolemo na bango elobaka lokuta. 11 Nzambe, Iakisa bango ete bazali na mbeba! Tika ete mabongisi na bango ekweyisa bango; bengana bango mpo na masumu na bango ebele pamba te batombokeli yo. 12 Kasi tika ete baoyo nyonso bayaka kobombana epai na yo basepela, bakoyemba mikolo nyonso na esengo mpe tika batela bango; mpe baoyo balingaka kombo na yo bakosepela kati na yo. 13 Yawe, ya solo opambolaka moto na sembo; ozingi bango na bolamu na yo lokola ebende ya makasi oyo ebatelaka basoda na tango ya bitumba.
